मराठी सारांश
डिझेल तस्करीबाबत वारंवार वृत्त प्रकाशित करणाऱ्या पत्रकार केवल महाडिक यांना धमक्या देण्यात येत असून, त्यांच्या घरी शस्त्रासह हल्ला करण्याचा प्रयत्न झाला. त्यांच्या वडिलांनी प्रसंगावधान राखत हल्लेखोरांना रोखले. सूत्रांच्या माहितीनुसार, डिझेल तस्कर पोलिसांना मोठा हप्ता देत असल्याचा दावा करत असून, पत्रकारांना ठार मारण्याच्या धमक्या दिल्या जात आहेत. पत्रकार मित्र असोसिएशनने या प्रकरणाची गंभीर दखल घेऊन पोलिसांनी वेळीच कारवाई करावी, अन्यथा मोठी दुर्घटना घडू शकते, अशी मागणी केली आहे.
English Summary
Journalist Keval Mahadik, who has been actively reporting on diesel smuggling, has received threats, and an armed attack was attempted at his residence. His father managed to prevent the attack by disarming one of the assailants. Sources indicate that diesel smugglers claim to pay hefty bribes to authorities and are openly threatening journalists. The Journalist Friends Association has urged the police to take immediate action to prevent any untoward incident.
पत्रकारांना धमक्या, हल्ल्याचा प्रयत्न
रेवदंडा येथे सीमाशुल्क विभागाने नुकतीच केलेल्या कारवाईनंतर साप्ताहिक कोकणसंध्या, रायगडचा भूमिपूत्र न्यूज आणि कोकणसंध्या न्यूज चॅनेल यांनी या विषयावर सतत वृत्तांकन केले. त्यामुळे त्रस्त झालेल्या डिझेल तस्करांनी पत्रकार केवल महाडिक यांना लक्ष्य करत त्यांच्या करंजाडे येथील घरी हल्ला करण्याचा प्रयत्न केला.
या हल्ल्यात केवल महाडिक यांचे वडील दीपक महाडिक यांनी प्रसंगावधान राखत हल्लेखोराच्या हातातील कुऱ्हाड हिसकावली, त्यामुळे हल्लेखोर पळून गेले. जाताना त्यांनी “तुमच्यासारखे अनेक पत्रकार संपवले आहेत, आमच्या नादी लागू नका” अशा धमक्या दिल्या.
पोलिस आणि यंत्रणांची भूमिका संशयास्पद?
सूत्रांच्या माहितीनुसार, डिझेल तस्कर मोठ्या प्रमाणावर पोलिस आणि सीमाशुल्क अधिकाऱ्यांना हप्ता देत असल्याचा दावा करत आहेत. “५ कोटी रुपये आम्ही सरकारला हप्ता देतो, त्यामुळे कोणताही पत्रकार आमचे काहीही करू शकत नाही.” अशी चर्चा तस्करांमध्ये सुरू आहे.
तस्करांच्या या वर्तनामुळे सागरी सुरक्षेचा गंभीर प्रश्न निर्माण झाला आहे. सीमाशुल्क विभाग आणि इतर तपास यंत्रणा कारवाई करत असल्या, तरी रायगड पोलिस या प्रकरणावर गप्प असल्याने त्यांची भूमिकाही संशयास्पद वाटत आहे.
पत्रकार सुरक्षा आणि कायद्याची अंमलबजावणी गरजेची
पत्रकार केवल महाडिक यांनी अनेकदा अवैध धंद्यांविरोधात आवाज उठवला आहे. त्यांनी रायगड आणि नवी मुंबईतील तस्करीविरोधात वारंवार बातम्या दिल्या आहेत. मात्र, गुन्हेगार त्यांच्यावर दबाव आणण्याचा प्रयत्न करत आहेत.
पत्रकार मित्र असोसिएशनने या प्रकरणाची तातडीने दखल घेऊन पोलिसांनी कठोर कारवाई करावी, अन्यथा संभाव्य दुर्घटनेसाठी डिझेल तस्कर आणि संबंधित यंत्रणा जबाबदार ठरतील, असे स्पष्ट केले आहे.
