मराठी सारांश
सिडकोच्या स्वस्त दरामध्ये फ्लॅट देतो असे सांगून दोन आरोपींनी अनेकांची फसवणूक केली. नवीन पनवेलमधील सेक्टर 18 मधील भूखंडांवर नवे प्रोजेक्ट असल्याचे भासवून त्यांनी लोकांकडून लाखो रुपये उकळले. पोलिसांनी आरोपींना अटक करून न्यायालयात हजर केले असून त्यांना न्यायालयीन कोठडी सुनावण्यात आली आहे.
English Summary
Two individuals deceived multiple people by falsely promising affordable flats under CIDCO’s quota in New Panvel. They misrepresented a redevelopment project and collected lakhs of rupees without delivering the flats. The police have arrested the accused, and further investigations are ongoing.
सिडकोच्या नावाने फसवणूक; पोलिसांची कारवाई
पनवेल (प्रतिनिधी) – सिडकोच्या स्वस्त दरामध्ये रुम देतो असे सांगून दोन व्यक्तींनी अनेकांची फसवणूक केल्याचा प्रकार समोर आला आहे. या प्रकरणी खांदेश्‍वर पोलिसांनी इन्फ्रा प्रा. लि. कंपनीच्या मालक हर्षदा चव्हाण आणि कंपनीचे मार्केटिंग हेड हेमराज ठाकूर यांना अटक केली आहे.
खोट्या सबसिडीच्या नावाखाली फसवणूक
या दोघांनी सिडकोच्या मालकीच्या प्लॉट नं. 10, 12 आणि 14, सेक्टर 18, नवीन पनवेल येथे जुन्या इमारती पाडून नवीन इमारतींचे पुनर्विकासाचे काम असल्याचे सांगितले. त्यांनी “निल सिद्धी प्राईम” या नावाने प्रोजेक्ट विकसित होत असून, त्यातील 40% कोटा सिडकोच्या एमआयजी कॅटेगिरीसाठी राखीव असल्याचे आमिष दाखवले. शिवाय, हुडकोकडून सबसिडी मिळणार असल्याचा खोटा दावा केला.
12 लाखांहून अधिक रक्कम गमावली
या आमिषांना बळी पडून अनेक ग्राहकांनी रूम बुकींगसाठी तसेच स्टॅम्प ड्युटी आणि रजिस्ट्रेशन शुल्कासाठी जवळपास 12 लाख 81 हजार 200 रुपये आरोपींना दिले. मात्र, त्यांनी न रूमचे रजिस्ट्रेशन केले, न ताबा दिला आणि न परतावा केला. त्यामुळे फसवणूक झाल्याचे लक्षात आल्यावर रमाकांत येवारे, सुर्यकांत येवारे, संदीप शिर्के, संजय करंदीकर आणि प्रशांत मांगडे यांच्यासह अनेकांनी पोलिसांत तक्रार दाखल केली.
पोलिसांनी घेतली दखल
तक्रारीची दखल घेत खांदेश्‍वर पोलिसांनी हर्षदा चव्हाण आणि हेमराज ठाकूर यांना अटक केली. न्यायालयात हजर केल्यानंतर त्यांना न्यायालयीन कोठडी सुनावण्यात आली आहे. अधिक चौकशीत दोघांनी पनवेल परिसर तसेच मुंबई आणि उपनगरातही अशा प्रकारे फसवणूक केल्याचे उघड झाले असून विविध पोलीस ठाण्यांत त्यांच्यावर गुन्हे दाखल आहेत.
