शिव निर्णय / सोलापूर : राज्य उत्पादन शुल्क विभागाने शनिवारी मुळेगाव तांडा, सिताराम तांडा (दक्षिण सोलापूर तालुका) व चिकमहूद ता. सांगोला येथील हातभट्ट्यांवर धाडी टाकून नऊ गुन्ह्यात अडीचशे लिटर हातभट्टी दारू व चोविस हजार पाचशे पन्नास लिटर गुळमिश्रित रसायनासह पावणे सहा लाखांचा मुद्देमाल जप्त केला आहे.
सविस्तर वृत्त असे की, सोलापूर राज्य उत्पादन शुल्क विभागाने 25 नोव्हेंबर शनिवारी पहाटेच्या सुमारास अधीक्षक नितिन धार्मिक यांच्या नेतृत्वात दक्षिण सोलापूर तालुक्यातील मुळेगाव तांडा व सिताराम तांडा येथील हातभट्टी ठिकाणांवर धाडी टाकल्या. या छापा कारवाईत एकूण आठ गुन्हे नोंदविण्यात आले असून आरोपी नामे निकिता शाखा पवार, वय 19 वर्षे, रा. मुळेगाव तांडा, अनिता राजू पवार, वय 35 वर्षे, रा. मुळेगाव तांडा व संजय बाळू चव्हाण, वय 35 वर्षे, रा. सिताराम तांडा यांच्या राहत्या घरातून एकूण 250 लिटर हातभट्टी दारु व पाच हजार नऊशे लिटर गुळमिश्रित रसायन जप्त करुन जागीच नाश केले. मुळेगाव तांडा व सिताराम तांडा येथील वेगवेगळ्या हातभट्टी ठिकाणांवर धाडी टाकून पथकाने सतरा हजार नऊशे पन्नास लिटर रसायन जप्त करुन जागीच नाश केले. पहाटेच्या सुमारास टाकलेल्या धाडी दरम्यान अंधाराचा फायदा घेऊन पाच आरोपी पळून गेल्याने त्यांना फरार घोषित करण्यात आले असून त्यांचा शोध तपास अधिकारी करीत आहेत. या धाडसत्रावेळी आठ गुन्ह्यात एकूण अडीचशे लिटर हातभट्टी दारू व तेविस हजार आठशे पन्नास लिटर गुळमिश्रित रसायनासह साडे पाच लाखांचा मुद्देमाल जप्त करण्यात आला. ही कारवाई राज्य उत्पादन शुल्क विभागाचे आयुक्त डॉ. विजय सूर्यवंशी, संचालक (अंमलबजावणी व दक्षता) सुनिल चव्हाण, विभागीय उपआयुक्त विजय चिंचाळकर यांच्या आदेशान्वये व अधीक्षक नितिन धार्मिक यांच्या नेतृत्वाखाली उपअधीक्षक गुणाजी क्षीरसागर, निरिक्षक सदानंद मस्करे, राहूल बांगर, दुय्यम निरिक्षक उषाकिरण मिसाळ, सुरेश झगडे, शिवकुमार कांबळे, अक्षय भरते, मानसी वाघ, रोहिणी गुरव, कृष्णा सुळे, सहायक दुय्यम निरिक्षक मुकेश चव्हाण, अलीम शेख, जवान किरण खंदारे, अनिल पांढरे, इस्माईल गोडीकट, अशोक माळी, शोएब बेगमपुरे, चेतन व्हनगुंटी, वसंत राठोड, योगीराज तोग्गी, वाहनचालक रशिद शेख, दिपक वाघमारे व संजय नवले यांनी पार पाडली.
तसेच माळशिरस विभागाचे निरिक्षक संदिप कदम, दुय्यम निरिक्षक कैलास छत्रे, सहायक दुय्यम निरिक्षक आवेज शेख, जवान तानाजी जाधव, गजानन जाधव, तानाजी काळे व वाहनचालक मारुती जडगे यांच्या पथकाने सांगोला तालुक्यातील चिकमहुद गावातील लवटेवस्ती येथे नारायण महादेव गडदे, वय 45 वर्षे या इसमाच्या शेतातील हातभट्टी वर धाड टाकून त्याच्या ताब्यातून सातशे लिटर रसायन व इतर साहित्य असा एकोणविस हजार पाचशे पन्नास किंमतीचा मुद्देमाल जप्त केला.
आवाहन
सर्व नागरिकांना आवाहन करण्यात येते की, कोणत्याही ठिकाणी अवैध हातभट्टी दारु निर्मिती / वाहतूक / विक्री/ साठा, बनावट दारु, परराज्यातील दारु याबाबत माहिती मिळाल्यास या विभागाच्या टोल फ्री क्रमांक 18002339999 व व्हाट्सअप क्रमांक 8422001133 वर संपर्क साधावा, असे आवाहन अधीक्षक, राज्य उत्पादन शुल्क सोलापूर नितिन धार्मिक यांनी केले आहे.
