माजी विरोधी पक्षनेते आप्पासाहेब चौगुले  यांनी दिला धर्मराज काडादी यांना पाठिंबा

सोलापूर, –  महापालिकेतील माजी विरोधी पक्षनेते आप्पासाहेब चौगुले यांनी आमदार सुभाष देशमुख यांच्या कार्यपध्दतीला कंटाळून शनिवारी भाजप पक्ष सदस्यत्वाचा राजीनामा दिल्यानंतर रविवारी त्यांनी सोलापूर दक्षिण विधानसभा मतदारसंघातील अपक्ष उमेदवार धर्मराज काडादी यांना पाठिंबा देत हद्दवाढ भागातून मोठे मताधिक्य देण्याचा निर्धार व्यक्त केला.

दक्षिण विधानसभा मतदारसंघातून आमदार सुभाष देशमुख यांना भाजपने उमेदवारी देऊ नये, अशी मागणी भाजपच्याच माजी नगरसेवकांनी केली होती. त्यानंतर शनिवारी भाजपचे महापालिकेतील माजी विरोधी पक्षनेते आप्पासाहेब चौगुले यांनी भाजपमध्ये जुन्या निष्ठावंत अभ्यासू कार्यकर्त्यांची कदर नाही. त्यांना स्थान नाही. विचारात घेतले जात नाही, असे सांगत आमदार सुभाष देशमुख यांच्या कार्यपध्दतीला कंटाळून अखेर भाजप पक्ष सदस्यत्वाचा राजीनामा दिला होता.

गेल्या दहा वर्षांपासून भाजपमध्ये गटबाजी वाढली आहे. शिस्त राहिली नाही. पक्षापेक्षा नेत्यांना स्वतःचे राजकारण आणि गटबाजी महत्त्वाची वाटते. अशा परिस्थितीत काम करणे अवघड आहे. आमदार देशमुख यांच्या कार्यपध्दतीला मी कंटाळलो. त्यांनी पक्षात स्वतःचा एक पक्ष स्थापन केला असल्याची स्थिती आहे. आमदार देशमुख हे पक्षाचे नव्हे तर लोकमंगलचे नेते आहेत, असेच वाटते. माझ्यासारख्या अनेक जुन्या कार्यकर्त्यांचा विचार केला जात नाही, असा आरोप चौगुले यांनी केला. हद्दवाढ भागाच्या विकासासाठी या निवडणुकीत आपण अपक्ष उमेदवार आणि सिध्देश्वर परिवाराचे प्रमुख धर्मराज काडादी यांच्या पाठीशी राहणार असून त्यांना मोठे मताधिक्य या भागातून मिळवून देण्याचा आपला प्रयत्न राहील, असे त्यांनी सांगितले.

यावेळी प्रा. डॉ. संतोष मेटकरी, होनमुर्गीचे माजी सरपंच अमोगसिध्द वाघमारे, अण्णाराव कांबळे, भीमाशंकर सनगुंदी आदी उपस्थित होते.

.