जागतिक प्राणी दिन

अश्मयुगीन काळापासून मानव आणि प्राणी या दोहोंमध्ये मैत्रीचे नाते आहे. काळानुरूप मानवाच्या राहणीमानात बदल होत गेला. मानव सुसंस्कृत झाला, पण मानव आणि प्राण्यांमधील मैत्रीचे नाते अबाधित राहिले, पण मागील काही वर्षांपासून मानव आणि प्राण्यांमधील मैत्रीचे नाते ताणले गेल्याचे पहायला मिळते. मानवाकडून प्रत्यक्ष वा अप्रत्यक्षपणे प्राण्यांचा छळ सुरू आहे. मानवाच्या काँक्रीटच्या जंगलामुळे प्राण्यांचा अधिवास असलेले जंगल नामशेष होत आहे. परिणामी पृथ्वीवरील रानटी प्राण्यांचे अस्तित्व धोक्यात आल्याचे पहायला मिळते. आज विविध विकासकाम विविधांमुळे बेसुमार वृक्षतोड सुरू आहे. त्यामुळे बिबट्या, कोल्हा, वाघ यांसारखे जंगली प्राणी आज मानवी वस्तीत आढळतात. या परिस्थितीला संपूर्णपणे मानवच जबाबदार ठरतो. मानवाच्या विकासाच्या अजेंड्यामुळे प्राण्यांचे अस्तित्व नकळतपणे धोक्यात आले आहे. प्राण्यांचा छळ केला जातो. यामध्ये पूर्वापारपासून चालत आलेल्या परंपरा कारणीभूत ठरतात. प्राण्यांच्या शर्यती लावणे, सर्कशीत प्राण्यांना चाबकाच्या तालावर नाचवणे, प्राण्यांना घरात कोंडून ठेवणे यांसारखे प्रकार प्राण्यांचे अस्तित्व धोक्यात येण्यासाठी कारणीभूत ठरत आहेत. प्राण्यांची कातडी, नखं, दात यासाठी आज मोठ्या प्रमाणात प्राण्यांची शिकार केली जाते.

हे रोखण्यासाठी आज विविध कायदे अस्तित्वात असले तरी त्यांची प्रभावी अंमलबजावणी होताना दिसत नाही. प्राण्यांचे धोक्यात आलेले अस्तित्व टिकवून ठेवण्यासाठी सर्वांनी एकत्र येऊन उपाय करणे गरजेचे आहे. कारण मानवाप्रमाणेच पृथ्वीवरील इतर प्राण्यांचे अस्तित्व महत्त्वाचे आहे. सध्या निसर्गचक्र पूर्ण होण्यासाठी प्राणी मात्रांचे अस्तित्व टिकवून ठेवणं गरजेचे आहे.